Ua tuuina mai nei se faamaoniga mai le Matāgaluega o le Soifua Mālōlōina a Niu Sila, e amata atu i le asō, afai ae aga’i atu se tagata i le falema’i, ona o se fautuaga a lana foma’i, poo le GP mo siaki o le kanesa o le taufale, e ono tuuina atu i le tagata se ituaiga siaki poo le FIT test, e mafai ai ona siaki lea tagata, ma mafai ai ona iloa e le foma’i tagata e moomia ona vave faia loa iai togafitiga.
Faamanino e le Health New Zealand, i lea faiga fou, o le a tuuitiitia ai le pasene o tagata o loo faatalitali mo sa’ili’iliga o le fā’ata o totonu o le manava poo le colonoscopy i le 30%, ma vave iloa ai tagata e ono maualuga tulaga o aafiaga ma faatino ai togafitiga.
Ta’ua o ē ua mautinoa le aafia (positive test) o le a vave ona faasolo iai togafitiga uma, ae mo ē e lē o iai i se tulaga ogaoga (lower risk) e mafai ona faaauau pea togafitiga e a latou lava foma’i poo GPs.
Mo le silafia o le kanesa o le taufale, ua faamauina o le kanesa lea o loo lona lua i kanesa ua faaalia le matua’i ogaoga ma to’atele ai tagata ua maliliu ai i totonu o Niu Sila, lea e silia ma le 1,200 tagata e maliliu ai i tausaga ta’itasi.
Puna o Faamatalaga: https://www.rnz.co.nz/news/health/648297/hospitals-can-now-give-out-bowel-cancer-screening-tests-to-symptomatic-patients
