O loo i Ausetalia nei le aumalaga o le lakapi pa’i a Samoa poo le Samoa Touch Rugby team o loo auai ai i le taamilosaga le Asia Pacific Opens Touch Cup 2026 ua amata aloa’ia i le asō.
O ‘au a alii ma tama’ita’i o loo tausinio ma o le faasologa o taaloga i le aso na mua’i taaalo ai le ‘au mixed a Samoa ma le ‘au malosi a Hong Kong China i se taimi e le’i mamao atu.
O le isi taaloga a le itupa o alii i le Open e fetaui ai foi ma Hong Kong China.
O le itupa o tama’ita’i e fetaui le ‘au a Samoa ma Chinese Taipei, sosoo ai ma le isi taaloga a le itupa o alii i le vaega o le Open e taaalo ai ma Greece ae faai’u i le fetauiga a le ‘au a tama’ita’i Samoa ma le Touch Football Australia i le ta o le 6 i le afiafi ananei i le taimi Ausetalia.
O le aso muamua lea o le taamilosaga o loo faagasolo i Mudgee i Sini ma e to’atele foi nai o tatou tagata ma totino o iai tagata Samoa i Sini o loo malaga atu ai e faailoa le lagolago ma le tapua’iga i taumafaiga a nai alo o si o tatou atunuu.
O le faatalanoaga a le alii faasalalau o Ono Tiitii ma le sui o le aumalaga na faailoa ai e le Peresetene o le Samoa Touch Rugby, Matiu Tuilevā e faafetaia le lagolago a nai tamalii Samoa i Sini sa faaoo atu le lagolago i soo se auala ma o se malaga foi e le’i faigofie lona tapenaina aemaise e lata i le 20 na malaga mai Samoa, tuufaatasi ma nisi sui mai Niu Sila ma Ausetalia ua tuufaatasi ai le ‘au.
O le taamilosaga faato’ā faamae’a i le Aso Sa ma o loo una’ia foi le mamalu o le atunuu i Sini ma nofoaga lalata atu ina ia lagolago ma tapua’ia foi le masii mai o nai alo ma fanau a Samoa i lea fā’agatama o le lakapi pa’i.
