Ua faia se faai’uga i le vaiaso nei a le pulega o le Faletupe Tutotonu o Samoa e faatumau faiga faavae tau tupe a le atunuu poo monetary policy, a o māta’itū ai pea le siitia o le tau o oloa ma le sii maualuga ai ma le tau o oloa tau suāuu ma penisini i le lalolagi.
I se pepa o faamatalaga ua faailoa ai se finagalo o le tama’ita’i Kovana o le faauluuluga o le Faletupe Tutotonu le afioga Maiava Onofiatele Atalina Ainuu Enari ma ia faailoa ai, o loo fuafua e siitia le tau o oloa eseese i le isi tausaga o muamua i se tulaga lē tumau e māfua i le siitia pea o le tau o suāuu ma penisini i le lalolagi, ma o le faai’uga e faatumau ai ma faiga faavae tau tupe a Samoa o le a faatumau ai ona faapaleni le tau o le soifuaga i Samoa ina ia faaauau ai le lagolago i le faatupuina o le tamaoaiga o le atunuu.
Mo le isi 12 masina o muamua nei ua fuafuaina le siitia o le tau o le soifuaga i se tulaga lē tumau, e pei ona iai le vaaiga mamao i le siitia i le va o Me o le tausaga nei mai le 1 tesimale 0 pasene i le 3 tesimale 8 pasene ia Iuni o le tausaga fou 2027.
E ui o le vaaiga mamao e oo le siitia o le tau o le soifuaga i le 3 tesimale 8 pasene i le faai’uga o Iuni o le tausaga a sau, peita’i o loo iai le isi vaaiga mamao i le palasi ifo i le 3 tesimale 0 pasene i le tausaga faaletupe fou.
O le ola o le tamaoaiga o Samoa ua faatulaga mai e le Faletupe Tutotonu e oo i le 2 tesimale 7 pasene i le tausaga faaletupe o lumana’i nei e māfua mai lea i le siitia o tupe faaalu a le malo i ana galuega o le atina’e ma le siitia o tupe faamomoli mai fafo ma tupe maua mai le atina’e o tagata tafafao.
O tupe teu faaagaga mo fefaataua’iga o loo i se tulaga malosi lea o loo faamauina e le Faletupe Tutotonu o Samoa i le 1 tesimale 7 piliona tālā lea o loo fuafua e mafai ona aumai ai oloa mai fafo mo le isi 15 masina o muamua nei.
O lea tulaga lelei ua faaalia lava e le Faletupe Tutotonu o le atunuu ua matuā sili atu lea i le 4 masina sa fuafuaina.
O loo faaauau ona māta’itū e le Faletupe Tutotonu tulaga o loo tula’i mai i le va o malo aemaise o feteena’iga o loo aafia ai le atunuu o Amerika ma Iran.
