O Fepuari o le tausaga e 2023 na alu ese ai ma Samoa le alii o Anthony Pele o se tagatānuu o Ausetalia o loo sa’ilia e leoleo o lea atunuu.
Ua faailoa e le Sui Komesina o le matāgaluega o leoleo i Samoa, e leai ni faamaoniga o lipoti ua ta’ua ai o loo i Samoa lea tagata.
I le feiloa’iga ma tusitala na faailoa ai e le Sui Komesina susuga Leiataua Samuelu Afamasaga, ua na o le tuaa tamā ma le uso o lea taule’ale’a sa i Samoa ma atonu o le māfua’aga lea o le faapea o nisi o loo i Samoa ma Anthony Pele.
O lea taule’ale’a e pei ona faailoa e le Sui Komesina o loo maua i faamaumauga a le vaega o femalagaa’iga, sa ia tuua Samoa ia Fepuari o le tausaga e 2023.
O Anthony Pele o loo tuua’ia i ni solitulafono e aofia ai le faaoo o le maliu i se tagata i Ausetalia ia Aokuso o le tausaga e 2023, ma o se tasi o le kegi o le Coconut Cartel lea sa ta’ita’i ai Lorenzo Lemalu na maliu i se gaioiga solitulafono i Vietnam o loo tuua’ia ai alii talavou e to’alua mai Samoa.
