E 200 kilomita poo le 124 maila o le a taufetuli ai ni tagata Samoa o loo taalo i taaloga afeleti taufetuli i le kalapu o le AI Training Club i le atunuu o Ausetalia ma le faamoemoe e soo ai le motu atoa o Upolu i aso e lima.
O se taufetuliga o le a tuli ai le 24 maila i le aso poo le 40 kilomita le mamao i le autū e sa’ili se tupe e fesoasoani ai i le faalapotopotoga o le Toomaga mo ē Puapuagatia o loo tausia ma vaaia fanau sauāina i le nofoaga o le Campus of Hope i Tuanaimato.
Ua faafetai ai le Toomaga mo ē Puapuagatia i ia tamafanau a Samoa ona o le latou ofo e faia lea taufetuliga ae sa’ili tupe ai mo le tausia o fanau sauāina o loo tausia e lana auaunaga.
Ua faafetai foi le faalapotopotoga i le kamupani o le Kamikeza Energy i le lagolagoina o lea faamoemoe.
Faaalia i se pepa o faamatalaga e se tasi o tamafanau a Samoa o loo aofia ia i latou o le a auai i le taufetuliga faataamilo i Upolu, ua sii o latou aao e fai so latou sao ia Samoa e ala i fanau ua aafia i sauāga o le tino ma le mafaufau ona o gaioiga solitulafono.
O le aso 30 o Iuni e amata ai lea taufetuliga ae mae’a i le aso 4 o le masina fou o Iulai.
