Na faamavae le sui faipule o Vaimauga 3 na filifilia i le palota tele na faia ia Aokuso o le tausaga ua mavae ma māfua ai le palota laitiiti a lea itumalo na faia i le masina na te’a nei o Me.
Peita’i o le a toe faia le isi palota laitiiti e sa’ili ai se tofi faipule o lea itumalo i le Palemene, ina ua soloia i le faai’uga a le faamasinoga o palota i le Aso Gafua o lenei vaiaso le nofoa o Vaimauga 3 sa manumalo ai le afioga Lautimuia Uelese Vaai i le faai’uga o le palota laitiiti ia Me.
E sefulu moliaga o faiga faaālatua ua faamaonia faasaga i lē sa avea ma faipule e māfua i le tagi tau palota na faaulu e le afioga Taioaliiseu Fiti Aimaasu sa tauva i le palota laitiiti ua mae’a.
O ia moliaga o le ave o tupe ma le faamoemoe e faatosina ai le filifiliga a nisi o tagata palota o le itumalo.
O moliaga a Lautimuia sa tuua’ia ai Taioaliiseu, e fā ua faamaonia ma o le tasi o ia moliaga o le tupe e 3 afe tālā na ave o se vaega o faaaloaloga i le faalauiloa a le vaega faaupufai o le Faatuatua i le Atua Samoa ua Tasi sa faia i le afio’aga o Magiagi.
Ua faaalia i le faai’uga e ui o se tupe na māfua ona ave ona o faaaloaloga faaleaganuu peita’i o se gaioiga sa faamoemoe e faatosina ai le palota.
O le a tuuina atu e le faamasinoga lana faai’uga i le Fofoga Fetalai o le Palemene e tusa o aiaiga o le tulafono, ma ua soloia ai le nofoa o Vaimauga 3 sa seei ai le afioga Lautimuia Uelese Vaai.
