O le Southpoint Family Doctors o se tasi lea o faalapotopotoga tau i le soifua maloloina sa faatuina e fesoasoani atu i tagata Pasefika, aemaise o le tuuina atu o fautuaga faafomai ina ia mautinoa o loo saogalemu ma maloloina lelei tagata e aga’i atu.
O se faalapotopotoga sa faatuina ma amataina e tamaitai fomai, le susuga ia Dr Hinamaha Lutui ma Dr Fiona Shepherd.
O ni uo mamae na aooga i aoga faafomai, ma o ni tamaitai na momoo e faatuina se ofisa, ae o se faalapotopotoga e mafai ona fesoasoani atu i tagatanuu la te alolofa ma mafuta iai i aso uma, le itu i Saute o Aukilani.
Na ta’ua e ia tamaitai, sa telē lava lo la talitonuga e maualuga le fesoasoani e maua e o tatou tagata pe a galulue e faatuina lea faalapotopotoga, ma o lea na finau ai loa e amata faatino lea tulaga i le 10 tausaga talu ai.
A o lei amataina lea faalapotopotoga poo le healthcare, na faasoa tamaitai fomai i le tulaga faigata sa iai i tau amata mai o le Southpoint Family Doctors.
Na ta’ua foi e i la’ua nei, e leai se tasi o i la’ua e iai se malamalamaga, pe iai foi se tomai e faafoe ai se pisinisi, peitai sa taumafai lava ina ia olaola lelei lea pisinisi mo tagatanuu Pasefika.
Ma i le taimi nei, na ta’ua e tamaitai fomai ua oo atu i le toatolusefulu (30) le aufaigaluega ua galulue i le faalapotopotoga, e aofia ai foma’i, tausi soifua faamauina, ma le tele o sui e galulue mo le soifua maloloina lelei o tagatanuu.
Ua faamauina le tele o auaunaga e maua i le Southpoint Family Doctors, e aofia ai faatalatalanoaga (medical consultations), o vaega e vaavaai i aao poo vae se’i tulou (podiatry), o le faatalanoaga o le maloloina lelei o le mafaufau (mental wellness ma psychology), o suesuega faafomai ma tulaga o le soifua manuia o tagatanuu (health screening and social navigation).
E tele lava auaunaga ua ofoina e le Southpoint Family Doctors i lalo o le faamalumaluga o tamaitai fomai ia Dr Hinamaha Lutui ma Dr Fiona Shepherd, ma o le naunauta’iga o i la’ua nei ia faaauau pea le auaunaga, e tautua ai i o tatou tagata Pasefika.
