Ua molia i le asō se ulugalii na soifua ane i Lusia ae o loo i Ausetalia nei, feta’ua’ina sa o la tagofia ni faamatalaga tau militeli a Ausetalia ma faasoa agai ia Lusia.
O le komesina o leoleo a Ausetalia Reece Kershaw na ia faailoa i le autusitala o se tamaitai 40 tausaga e i le ami a Ausetalia ma lona toalua e 62 tausaga na pu’eina mai lo la fale i Brisbane i le vaiaso nei ma ua faia iai moliaga.
Fai mai le komesina o ituaiga moliaga e faapea, espionage offence e ono oo atu i le 15 tausaga i le falepuipui e faasala ai.
Ua faailoa o le tamaitai ua molia o se technician tau komepiuta ma sa malaga i Lusia a o ave ona livi mai le ami, fai mai sa galulue faatasi ma lona toalua e tagofia faamaumauga a le vaega o le puipuiga a Ausetalia.
O moliaga muamua ia ua faia i lalo o tulafono fou ia na faia i le 6 tausaga talu ai.
O ofisa suesue o le malo e aofia ai le AFP, Australian Federal police, ASIO ma isi sa taulamua i lenei suesuega.
Fai mai o le ulugalii ua molia ua silia ma le 10 tausaga o aumau i Ausetalia ma o le asō e tutulai ai i le faamasinoga i Brisbane.
Puna o Faamatalaga: https://www.9news.com.au/national/australian-soldier-and-husband-charged-with-spying-for-russia/72e72264-a236-40e9-89c6-ee1bc27dfb90
