I le lumanai ai nei o le isi iva o masina o lenei tausaga fou, ona faatino lea o le tasi o taligamalo tele a le atunuu, o le fono lea a taitai o Malo o le Taupulega, e lē o alo tamala lo tatou Malo i le faia o tapenaga uma auā o se taimi muamua lea ua talimalo ai se atunuu laititi o le Pasefika, i lea fono faavaomalo.
Ua faailoa i se lipoti i le faaiuga o lena tausaga ua mou mālie atu, le avea ai o se tasi o faletalimalo i lo tatou atunuu, le Sinalei Resort i Siumu, ma nofoaga e faamautu ai le faauluuluga o Malo o le Taupulega, lana Maiesetete le Tupu o Salesa III.
O le saunoaga faamanuia o le tausaga fou a le taitai o le tatou Malo, le afioga i le Tamaitai Palemia na ia ave ai le tuualalo i lo tatou atunuu i le tāua o le galulue faatasi o le Malo ma tagata uma, ina ia sao ma uli lea faamoemoe tele ua faitau masina nei ona faataunuuina lea, ia Oketopa o lenei tausaga fou 2024.
Le afioga i le taitai o le Malo le Tamaitai Palemia, Afioga Fiame Naomi Mata’afa.
