Ua i luma o le Faamasinoga Maualuga ni talosaga a le Loia Sili a le malo ua finau ai e aveese ma taofi le su’esu’eina o le talosaga ua faaulu e le sui faipule o Faleata 3 le tōfā, Lealailepule Rimoni Aiafi, lea ua finau ai e toe faia se iloiloga a lea faamasinoga i le faaiuga a le Faamasinoga Faaitumalo na lē mafai ona faamaonia ai ni moliaga sa tuua’ia ai le Palemia susuga, Laaulialemalietoa Leuatea Poalataivao Fosi, ma isi e toalima e aofia ai Fepuleai Faimata Su’a, o Li’o Faataumalama, Lise schmidt, Samuelu ma Sivai.
O le faaiuga na fofogaina i le masina o Mati e le’i faamaonia moliaga o le Palemia, Fepuleai ma Li’o ae faamaonia nisi o moliaga sa tuua’i’a ai isi e toatolu.
I le valaauina o le talosaga a Lealailepule Rimoni i le Aso Gafua ua tuu le avanoa i loia a le itu o loo talosaga e tali atu ai i le talosaga tete’e poo le strike out a le Loia Sili ma e tatau ona toe valaau le mataupu i le aso 20 o le masina nei o Iulai ua mae’a tuuina atu se tali, ona faatulaga ai lea o se aso e su’esu’e ai le finauga a le Loia Sili.
