O le usuia i Samoa i lenei vaiaso o le fono lona 34 a le Faalapotopotoga o le A’oa’oina o le Gagana Samoa i totonu o Aotearoa le F.A.G.A.S.A, ua toe fafagu mai ai le lagona o se tasi o faiaoga o le gagana Samoa ma le aganuu le afioga, Aiono Dr Fanaafi Le Tagaloa na ia ta’ua ai, “A leai se gagana ua leai se aganuu, a leai se aganuu ua po le nu’u”.
Ua toe faamanatu e le Sui Palemia i lana saunoaga na tatala ai le fono a le F.A.G.A.S.A i lea mau, ona e tutusa le mau ua autu iai le fonotaga o le, “Afua mai mauga le manuia o le nuu”, ma le autu o le tulafono o le faavaeina o le Komisi o le Gagana Samoa, o le faaolaola ma faatumau le tatou gagana.
O le nofoaga tutotonu o tu ma aganuu i Malifa o loo iai le ofisa autu o le Matagaluega o Aoga ma Aganuu o loo faagasolo ai le fonotaga a le F.A.G.A.S.A lea e 120 le au malaga mai Niu S ila o tama fanau a Samoa o faiaoga o loo auai.
Le afioga i le sui Palemia afioga, Mulipola Anarosa Ale Molioo i le tatalaina o le fono lona 34 a le F.A.G.A.S.A le faalapotopotoga mo le a’oa’oina o le gagana Samoa i Niu Sila.
Sa maua le avanoa e fesiligia ai le Peresitene Aoao o le faalapotopotoga e tusa ai o le masii mai e faatino lana fonotaga i Samoa.
Le susuga Fata Vaitimu Togi Lemanu ose faiaoga ma o le Peresitene Aoao o le Faalapotopotoga mo le A’oa’oina o le Gagana Samoa i totonu o Aotearoa le F.A.G.A.S.A.
