O le faase’e atu i le Faamasinoga Maualuga e su’esu’e ai le tagi o le faia o tala tau faaleaga o lo’o tu’ua ai le afioga i le Palemia, o le mafua’aga e leai se faamasino o le Faamasinoga Fa’aitumalo e mafai ona tauave ona o aafiaga i le mataupu poo le conflict of interest, ua toe fa’afoi ai lea mataupu tau fa’amasinoga i le Fa’amasinoga Fa’aitumalo e su’esu’e ai.
O le Aso Gafua na faia ai lea faaiuga a le afioga i le faamasino o le Faamasinoga Maualuga le afioga, Fepuleai Ameperosa Roma e mafua ona ua lē mafai ona faamalieina lea faamasinoga i le mafuaaga.
Peitai ua faailoa e le afioga i le faamasino afai ae leai lava se faamasino o le Faamasinoga Faaitumalo e mafai ona ia tauavea lea tagi, ona saili lea o se faamasino o le Faamasinoga Maualuga na te tauaveina i le Faamasinoga Faaitumalo.
O moliaga o lea tagi e ao lava ona su’esu’eina e le Faamasinoga Faaitumalo ma ua faatulaga ai le Aso Lua o le vaiaso asau e toe valaau ai i lea faamasinoga ma saili ai se aso e valaau ai molimau.
O moliaga o le faia o ni tala tau faaleaga faasaga i le Ta’ita’i o le Malo, e afua mai i sona finagalo a o avea ma Minisita o Faatoaga ma Faigafaiva i le Faigamalo talu ai sa agiga i se faasalalauga ma sa faatūtū i alii leoleo o loo faauluina le tagi, ma sa ta’ua ai lo la maua o ni tupe sa lafo mai se tagata i Ausetalia ma aafia ai le faatinoina o le la galuega faaleoleo a’o su’esu’eina le faalavelave tau taavale na maliu ai Tuuau Faasavalu.
O ia malu o le malo o le susuga Tupa’i Sapani Leleimalefaga ma Tony Tevaga.
