O loo mata’itū ma le toto’a e le vaega o le Puipuiga a Ausetalia ni vaatau se 3 a Saina ua lipotia o loo iloa atu i le tusa ma le 150 maila mai Sini.
Fai mai lipoti o ia vaa na mua’i iloa i ogasami faavaomalo i le itu i Matu i Sasae o Kuiniselani i le vaiaso talu ai, ae o lea la ua vaaia ua lalata mai i Sini.
Fai mai le vaega o le puipuiga a Ausetalia, e faaaloalogia e Ausetalia aiātatau a setete uma e faatino ai lo latou sa’olotoga e uia ogasami faavaomalo faapea foi i le ea i lalo o tulafono faavaomalo aemaise lava le UN Convention i le tulafono o le sami.
E talitonuina e pei ona ta’ua i lipoti o le aupito i mamao lea ua aga’i mai ai vaa o le Navy a Saina i le itu i Sasae o Ausetalia e ese mai isi malaga asiasi e masani ona asia ai Ausetalia.
Fai mai le minisita o le puipuiga, Richard Marles ua mae’a ona ia poloa’iina le Navy ma le Airforce ina ia mata’itū ma le toto’a le tulaga lea ma ia faatino foi i se tulaga saogalemu ma faapolofesa ona fai, o le aiātatau foi lea a Ausetalia.
Puna o Faamatalaga: https://www.9news.com.au/national/chinese-naval-ships-spotted-150-nautical-miles-from-sydney/143bb31b-1970-44a0-a657-9c8c4dfb6da8
