I le tolu masina na toesea ai ma o latou aiga aemaise o paaga i totonu o le matagaluega o leoleo, falepuipui ma le toe fuataina, o le auvaa e toa 22 a le vaaleoleo o le Nafanua III, e lei fai aso fiafia o le Kerisimasi ma le Tausaga Fou ma fanau ma aiga.

O le folau mai ai i Samoa o le vaaleoleo ma taunuu manuia i le Aso Faraile na tea nei, o se taimi sili lea ona tāua mo le auvaa atoa ona ua toe feiloai fiafia ma mātua, o taitoalua ma fanau aemaise o aiga ma uo.

O le auvaa o le Nafanua III na malaga mo aoaoga ma aumai le vaaleoleo sa aofia ai ni tamaitai ua galulue i le vaaleoleo, o se meaalofa mai le Malo o Ausetalia e tauala mai i lana polokalame fesoasoani o le Puipuiga.

O le Aso Tofi o le vaiaso nei o le a faia ai le sauniga e aloaia ai le taunuu manuia i Samoa o le Nafanua III.