O talafaasolopito o le Palemene o Samoa ua faamauina ai nei o se ulua’i Palemia tamaitai ma lana Kapeneta ua lē mafai e ni lafo se lua o le lē faatuatuaina ona faamuta lo latou tauaveina o pulega o le malo.
Ua faafofoga ma silasila iai le atunuu i taualumaga a le Palemene i le Aso Tofi o le vaiaso nei i le talanoaina o le lafo lona lua o le lē faatuatuaina na tuuina atu e le sui faipule o Gagaifomauga 3 o le ta’ita’i foi o le vaega faaupufai o le Faatuatua i le Atua Samoa ua Tasi susuga Laauli Leuatea Polataivao Fosi Schmidt.
O saunoaga ma fetalaiga a sui usufono mamalu sa maua le avanoa e saunoa ai, e lē gata o le sui faipule na faauluina le lafo ae o le Itu Agai, faapea foi le itu a le malo i le Kapeneta.
