O lenei faatalatalanoaga na faafoeina e le Matagaluega o Faigafaiva ina ia faalauiloa ai fuafuaga ma nisi o laasaga e ao ina ausia e le vaega o faasao ma faigafaiva aemaise ai nisi o taiala ma mataupu auā le agai i luma o nei atinae.

O se avanoa lelei lea mo paaga uma o loo patino ai lenei faamoemoe e tuuina mai ai o latou finagalo i mataupu e ao ina malamalama ai le faataatiaina o nei fuafuaga.

I pepa o faamatalaga mai le Matagaluega o fuafuaga nei o loo atinae faatasi ma nisi o faiga faavae a le Malo ma le tulafono e puipuia ai faigafaiva o le gataifale 2016 o se vaega faatulafonoina e faalauiloa ai atinae faaauau i le fagotaina o le gataifale i le atunuu.

O fuafuaga nei o se matafaioi a le vaega o Faigafaiva e ala i le galulue faatasi ai ma nisi paaga mai fafo aemaise Samoa nei.

I le amatalia ai o lenei faamoemoe na faafetaia ai e le Pule Sili o le Matagaluega Seuseu Dr Tauati le sao a nuu ma afioaga e ala i Alii ma Faipule, komiti o tina aemaise le aumaga i nei atinae o loo taulamua ai i nuu i tua.

Na momoli ai le faamalosiau a le Pule Sili i sui o afioaga o le au fai faasao o le gataifale o sui mai nisi o Matagaluega a le Malo ma sui mai faalapotopotoga tuma’oti e faatāua ai le galulue faatasi o vaega nei ina ia mafai ona ausia nei faamoemoega uma ina ia malupuipuia ma saogalemu taumafa aemaise le soifua manuia o tagata uma.

E lei faagaloina foi le faafetai i nisi o paaga mai fafo mo la latou lagolagosua i le iloiloina o nei fuafuaga auā le atinae o lenei foi vaega tāua i le atunuu.

O lenei faatalatalanoaga sa faatautaia lea i Salelologa.