O le asō e iloa ai le tonu mai le malo e faatatau i sā o loo totoe nei o le Koviti.

O le asō e fono ai le Kapeneta ma atonu o se taimi o lenei vaiaso o le a faailoa mai ai poo le ā le tonu o le 7 aso faanofoesea mo tagata e aafia i le Koviti.

O le tele o tulafono nei o le Koviti na faaleaoga uma ia Setema o le tausaga talu ai, peitai e lei aveesea ai le moomia ona faia pea o le 7 aso faanofoesea.

Mai le Business New Zealand ua tatau i minisita ona faataitai i isi atunuu lea e le o toe faia ni faanofoesea, e pei ona iai Peretania lea ua silia ma le tausaga talu ona le toe iai se 5 aso faanofoesea.

O loo tumau lava foi le finau a le toatele o tagata faipisinisi o le 7 aso faanofoesea lea ua aafia ai ma pisinisi.

Peitai, a o faatali poo le ā se faaiuga a le Kapeneta mai lana fono i le asō, o loo tumau le augani mai o le alii suesue faapitoa ia Michael Baker, ia faatumauina pea le tulafono o loo faanofoesea ai ona o lea lava e saosaoa le pipisi ma fasiotia ai le toatele o tagata i Aotearoa.

Ae mai nisi o tagata suesue, o loo fai mai e faatumau pea le faanofoesea ae faia siaki e iloa ai le vave faamuta o le faanofoese pe faaauau pea ona tuli le 7 aso.