O le nofoaga o loo iai nei le faalapotopotoga o eleele le Samoa Land Corporation i Tuanaimato o le a avea ma nofoaga o le matagaluega o eleele ma fuagāfanua lea o le a feagai ma mataupu uma tau eleele o le malo, e aofia eleele o le Esetete Tausi.
Ua faailoa i upega tafailagi le amata tapena atu o le aufaigaluega uma sa galulue i le ofisa i Apia o le matagaluega o puna’oa faalenatura ma le siosiomaga i le nofoaga i Tuanaimato ma o le mafuaaga lea o le tapunia o auaunaga masani a lea matagaluega e amata atu i le afiafi o le Aso Tofi o le vaiaso nei i le mānava o galuega.
O le tausaga e 1962 na ulua’i faatūina ai e le Malo le ofisa o eleele ma fuagāfanua, ae ina ua oo mai i le tausaga e 1989 na tuufaatasia ai eleele ma fuagāfanua ma le vaega o le faasao ma le siosiomaga.
Na sosoo ai ma le avea ma Matagaluega o Puna’oa Faalenatura ma Siosiomaga seia oo mai ina iai le finagalo o le faigamalo ua iai nei e tuufaatasia uma auaunaga e fitoitonu i fanua ma eleele o le Malo i se matagaluega e tasi, e pei ona faavaeina ai le matagaluega o eleele ma fuagāfanua o le a i lalo o le pulega a se ofisa sili e to’atasi.
O loo iai le fuafuaga o le Aso Tofi le aso 5 o le masina fou o Setema o le a amata faaauau ai le auaunaga a le vaega o eleele ma fuagāfanua mai le nofoaga fou i Tuanaimato.
