Ua valaau le matai sili i se tasi o toa i upufai o Malo o Samoa sa tulai i le tofi faipule o nofoa e lua o le aupalota ta’ito’atasi, ma sa avea foi ma Minisita o le Kapeneta le susuga Jack Netzler i le 82 o tausaga o lona soifua.
O le Aso Lua o le vaiaso nei e pei ona faamaonia mai e se tasi o lona aiga na maliu ai o ia i lona maota i Motootua. Sa avea Jacob Olaf Jack Netzler ma faipule ma filifilia ai i le tofi Minisita i le taimi o avea le afioga i le Tootooalii Tofilau Eti Alesana ma Palemia, faapea foi i le taimi o le susuga Tuilaepa L Sailele Malielegaoi a o avea ma ta’ita’i o le Malo. O ia o se tasi o faipule o le vaega faaupufai e puipuia aiātatau a tagata.
A o avea Jack Netzler ma Minisita o Vaa ma le kamupani vaalele o le Polenisia, sa ia ta’utino le feagai o le kamupani vaalele a le atunuu i lea vaitaimi o le 1990 faasolo mai i le 1996 ma faigata tau tupe i le mau miliona sa nofo aitalafu ai le Polenisia i kamupani i fafo sa lisi mai ai vaalele tetele e lua o le Polenisia.
O ia o se tasi o faipule o nofoa e lua o le aupalota ta’ito’atasi sa seei i ia nofoa mo le taimi mulimuli a o le’i soloia nofoa o le aupalota ta’ito’atasi sa faapitoa i tagata palota e iai o latou sootaga totolua poo afakasi. Ua faailoa mai e se tasi o ona alo tamaitai, o le Aso Toonai nei lona sauniga o le misasā paia i le Malumalu Katoliko i Mulivai i Apia ma sosoo ai ma lona sauniga i le tuugamau i lona aiga i Motootua.
