I le tausaga e 2005 na uluai faavae ai le faalapotopotoga tumaoti o le Toomaga mo e Puapuagatia poo le Samoa Victim Support Group, o le tausaga nei 2025 ua atoa iai le 20 tausaga o le auaunaga a le faalapotopotoga.

Ua faailoa ai e le Toomaga nisi o ana polokalame faalauiloa i le tausaga atoa lenei e faamanatu ai lona 20 tausaga. O polokalame ia e aofia ai le tauvaga o tusiga solo, tauvaga tusiga ata, ma tauvaga lauga e auai fanau aoga a le atunuu.

O isi polokalame o solo ma savali e faalauiloa ai le tetee atu i sauaga lea ua ta’ua o Parades and Yellow ribbon outreach activities, o fono faalauaitele ma le atunuu, e auai i latou o loo fesoasoani ma lagolago i le Toomaga, o maketi e auai tina nofotane ma o latou taitoalua, ma isi tapenaga i le naunautaiga o le faalapotopotoga e avea o se talaiga lelei e maua ai e le atunuu le malamalama i lana tautua.

Ua iai foi ni fuafuaga mo le faia o ni sailiga fesoasoani poo fundraisings aua galuega faatino a le Toomaga mo e puapuagatia. Ua ave ai le faatalauula a le faalapotopotoga i ona sui auai ma sui lagolago aemaise nuu ma afioaga ua faamautu a latou faiga paaga ma le Toomaga ina ia auai i ia polokalame uma e patipatia ai le atoaga o le 20 tausaga talu ona faavae le faalapotopotoga.