Ua faailoa e le ta’ita’ifono o le komiti faafoe o le Lakapi Samoa le iai o se fuafuaga e faia se suegatupe i le faailogaina o le 100 tausaga o le taaloga lakapi i Samoa, e faaaogā ai fesoota’iga televavave faaonapo nei poo le online.

O le faamoemoe ia saili ai se seleni e faatupe ai le malaga a le Manu Samoa i Europa i le masina o Novema o le tausaga nei.

O le finagalo o le ta’ita’ifono na faailoa i se feiloa’iga masani ma tusitala, ina ua fesiligia i lana tusi na ave i le ta’ita’ifono o le pulega o le lakapi i le lalolagi, na faailoa ai le faai’uga e taofi le malaga taamilo a le aulakapi a le atunuu i le faai’uga o le tausaga nei, e mafua i faafitauli tau tupe ua feagai ma le Lakapi Samoa.

Faaalia e le ta’ita’ifono le susuga Tuilaepa L Sailele Malielegaoi, o faafitauli tau tupe e mafua i le lē toe faaauauina o polokalame sa fesoasoani ai le Malo i le atina’e o le lakapi.

Le ta’ita’ifono o le Komiti Faafoe o le pulega o le Lakapi Samoa ma le ta’ita’i o le Itu Agai, susuga Tuilaepa L Sailele Malielegaoi.

Ua faailoa e le Minisita o Tupe i se lipoti a le vaega faasalalau o le Samoa Global, talu ona pale atu le faigamalo a le Faatuatua i le Atua Samoa ua tasi, ua maua le 2 miliona o tupe ua fesoasoani ai le Malo i le pulega o le Lakapi i le atunuu.

O le tasi o ia fesoasoani tau tupe sa fesoasoani ai i le masii atu o le Manu Samoa i le Ipu o le Lalolagi.