O le afioga i le tamaitai Faipule o le itumalo o Magele ia Lemauga Lydia Sosene ua ia faailoa le tulaga o loo iai le faaauauina pea o le iloiloina o le pili o le sitiseni a Samoa i Niu Sila.
O Lemauga Lydia Sosene o se sui o le Labour Party o loo iai i totonu o le komiti o loo iloiloina lenei mataupu.
O mau ua tuuina atu a tagata Niu Sila e lagolago ai lenei pili, e silia ma le 25,000 i latou, o Samoa e latalata foi i le 30,000 i latou sa tuuina mai a latou tusi ae o loo aofia ai ma Ausetalia ma Amerika.
O le taimi nei o loo faaauau pea le galuega a le komiti filifilia a le Palemene auā le iloiloina o lenei mataupu.
O le masina fou o loo tapena ai le komiti filifilia o lenei mataupu e tatau ona tapena ai le lipoti auā le tuuina atu i totonu o le Fofoga Fetalai o le Palemene.
O le pili lenei o loo faatatau ia i latou na soifua mai i le tausaga e 1924 agai mai i le 1948.
Ae o le tele o mau tuistusia ma mau tuugutu sa tuuina atu i le komiti filifilia o loo avatu ai le mau e faapea, e lē gata ia i latou na fananau mai i le tausaga 1924 i le 1948 ae o loo iai ma le mau e tatau ona aofia ai ma fanau faapea foi fanau o fanau.
Ae o le pili lea na se’i nei e tatau lava ona faamanino ma faamalamalama lelei, i lona aano moni o le pili e faatatau ia i latou na fananau i Samoa i le tausaga e 1924 agai mai le tausaga 1948 o le pili lena e tatau ona faamanuiaina ma tuu iai le sitiseni, ae o le tulaga i alo ma fanau o tagata matutua o loo faatalatalanoaina pea e le komiti filifilia.
E fai si lavelave o le mataupu i le taimi nei e pei ona saunoa le afioga i le tamaitai Faipule, auā o le tele o mau na tuuina atu e le atunuu e faapea, ua tatau ona aveese mai le pili lea sa fai e le Palemia ia Robert Muldoon lea na taofi uma ai sitiseni, ae tuuina atu ai alo ma fanau.
O le komiti filifilia o lenei mataupu o loo aofia uma ai sui o pati ta’itasi i totonu o le Palemene, ma o loo tilotilo lelei i latou i le pili na tuuina mai i totonu o le Palemene.
O loo iai foi le avanoa e tuuina atu i le Palemia o Samoa e uiga i lenei pili i le atunuu, auā o loo iai le feagaiga a Samoa ma Niu Sila e ta’ua o le Treaty of Friendship.
O le avanoa o loo tuuina atu e le komiti mo le malo o Samoa, pe iai se aiātatau poo se manatu i lenei pili o loo suesueina, pe ioe pe leai ae e tatau lava i le komiti ona tuuina atu se avanoa mo le malo o Samoa.
