I le silia i le 300 o alii ma tamaitai ofisa sinia o auaunaga faaleoleo i totonu o le Malo tele o Amerika i ona setete e 50, ma sui o auaunaga faaleoleo mai atunuu e 30 o le lalolagi, o le alii leoleo asiasi poo se police inspector i le Matagaluega o leoleo, falepuipui ma le ola toe fuataina i Samoa le susuga Solomona Natia, o se loia foi, o le a lotolotoi i lea faatasiga tele i le nofoaga o aoaoga faaleoleo a Amerika le Federal Bureau Investigation poo le F.B.I.
O lea a’oa’oga e faagasolo i le masina fou o Aperila mo le umi e sefulu vaiaso ma ua taula’i i le aoaoina o i latou uma ua valaaulia e auai, i tomai i le suesueina o soligatulafono, faapea tapenaga o le tuuina atu oni solitulafono e finauina i luma o le faamasinoga.
O le nofoaga o le FBI i Quantico i Amerika ua faapitoa i le aoaoina o alii ma tamaitai leoleo suesue o le Iunaite setete, ma o le taimi muamua lenei ua faaaoga ai mo le aoaoga mo sui o auaunaga faaleoleo mai atunuu e 30 o le lalolagi ua aofia ai ma Samoa, faapea sui sinia o auaunaga faaleoleo i totonu o Amerika.
O le susuga i le alii leoleo asiasi ia Solomona Natia, e lei leva ona faauu i ona faailoga loia, ma ua mae’a foi ona faaulufale i galuega a le faamasinoga i Samoa.
O ia o se tasi o Malu o le Malo i le vaega o loo finauina moliaga solitulafono e tuuina atu i luma o le faamasinoga.
