O le faamasinoga a le talosaga apili o le faamasinoga maualuga ua ave iai latou te suesue ma iloilo ma faia se faaiuga i talosaga ua faaulu atu e le Loia Sili o le malo e mafua mai i le faaiuga a le faamasinoga maualuga o le Aso Gafua ua mavae le Aso 28 o Iuni.
O le faaiuga lea na poloaia ai le usuia o le fono a le palemene i totonu o le 7 aso ae faaleaoga le faatautoga na faia i le faleie.
O le faaiuga o le vaiaso ua mavae e oo mai i le amataga o le vaiaso nei na faaulu atu ai e le Loia Sili ni talosaga se lua.
1. Ia toe suesue e le faamasinoga apili le vaega o le faiauga i le usuia ai o le palemene i totonu o le 7 aso ma a le faia ua toe asiasi i le amanaia o le faatautoga na fai lea i le faleie.
2. Ia taofi le faia o lea faaiuga seia maea ona suesue le talosaga apili.
Ua iai foi se isi talosaga a le vaega faaupufai a le Faatuatua i le Atua Samoa ua Tasi ina ia asia loa e le faamasinoga le mataupu o le Doctrine of Necessity e aloaia ai le faatautoga o le Aso 24 o Me ona o lea ua lē usitaia e le Loia Sili ma isi mau tofi o le Malo le usuia o le Palemene i totonu o le 7 aso lea na maea i le itula e 4 afiafi o le Aso Gafua o le vaiaso nei. I le silasila a le faamaisnoga maualuga afai e faatino sana suesuega ae poo le a lava le latou faaiuga e taunuu iai e manino mai i le talosaga a le Loia Sili e po o le a foi le taunuuga e taunuu ai e oo lava lenei mataupu i le talosaga toe iloilo poo le faamasinoga apili. O le mafuaaga lea ua faia ai le faaiuga e sili loa ona ave uma talosaga itu auai e tagofia e le faamasinoga o talosaga apili ma faia ai se faaiuga.
O le silasila a le faamasinoga maualuga o lea ua tolu masina o fa’aauau pea le tulaga lē mautonu o upufai o malo. O le poloaiga a le Ao o le Malo na aumai i le po o le Aso Sa, ua manatu le faamasinoga maualuga o se isi gaioiga ua toe faia ae o loo mauasalī pea le malosi o lana faaiuga na faatumau ai le poloaiga a le Ao o le Malo i le Aso 20 o Me ina ia tauaofia le Palemene i le Aso 24 o lea lava masina.
Ua aumai foi se finagalo a le faamasinoga i lana faaiuga lenei e faapea mai o le poloaiga a le Ao o le Malo le Aso 20 o Me e tauaofia le palemene i le Aso 24 na faia e tusa ma manaoga o le vaega 52 o le faavae ona sa matuā talafeagai lelei ma le 45 aso o loo aiaia e le faavae e tatau ai ona usu le Palemene i le tuanai ai o le faigapalota tele a le atunuu lea na faia i le Aso 9 o Aperila.
O le faaiuga a le faamasinoga i le Aso 28 o Iuni na tuuina atu ai foi lana faaiuga e tauaofia le fono aoao faitulafono i totonu o le 7 aso peitai ua lē usitaia foi. O se faanoanoaga lea o le faamasinoga ona ua manino mai ai le lē logosaia ma lē amanaia faapea ona usitaia e le faigamalo faaauau le tumau o poloaiga o le faamasinoga.
O le 45 aso o loo aiaia e le faavae e tatau ai ona usuia le Palemene ua faaalia e le faaiuga na fofogaina i le Aso Tofi o lenei vaiaso ua faaluaina le taimi faaletulafono i le atoa ai o le 90 aso ua le faataunuuina lava manaoga o le vaega 52 o le faavae i le tatau lea ona usuia le fono aoao faitulafono.
O se tasi o vaega taua ua faailoa i le faaiuga lenei o le tiute tauave o le faamasinoga o le faauiga lea o le tulafono faavae. Ua faaleo foi se faanoanaoga a le faamasinoga i tulaga ua aliali mai ona o le Ao o le Malo ua avea nei o se tasi ua aofia i totonu i le faigamalo tausi ua leai se tutoatasi ma se galulue faatasi ae ua osofai le mamalu o le faamasinoga.
O le a suesueina la e le faamaisnoga o talosaga apili le talosaga a le Loia Sili ua toe finauina ai e iloilo le vaega o le faaiuga a le faamasinoga maualuga e faasino i le 7 aso lea ua maea sa tatau ona usuia ai le palemene.
O iloiloga nei o le a silasila ai le faamasinoga i mau a le Loia Sili ua faavae ai lana talosaga e toe apili se vaega o le faaiuga lea na fofogaina i le Aso Gafua ua tuanai faasino lava i le 7 aso e usuia ai loa le fono aoao faitulafono lea o loo ilitata ma lē talia e le Palemia o le malo tausi lē tumau. O le a iloa i le maea o nei iloiloga pe talia pe teena le apili a le Loia Sili.
