E iai se ata video sa salalau i luga o le api o foliga i le vaiaso nei, ma o loo faailoa ai se osofa’iga a leoleo i se aiga i Vaivase uta na pu’eina ai se alii talavou sa lafi i le fā’alo o le fale o le aiga.

O loo ta’ua ai e le tagata na pu’eina le video i se telefoni feavea’i o le taulealea na pu’e e leoleo o se nephew o le afioga i le Fofoga Fetalai susuga Papalii Li’o Oloipola Ta’eu Masipa’u.

Ua aumai ai nei i se pepa o faamatalaga faalauaitele se finagalo o le Fofoga Fetalai, ua ia faailoa ai e sese lea tuua’iga e pei ona faasalalau i le itulau i le api o foliga e ta’ua o le SSIG.

O loo faaalia i le pepa o faamatalaga, o le tofiga o le Fofoga Fetalai ma lona ofisa o se tofiga faa-Palemene.

O le mafuaaga lea ua alagatatau ai ona aumai faalauaitele se faamatalaga i lea faasalalauga lē sa’o ma tuua’ia ai le Fofoga Fetalai i se sootaga faaleaiga i le taulealea na pu’eina e leoleo.

Ua fautuaina e le Fofoga Fetalai i latou e ana le itulai na faasalalau ai lea faamatalaga, ina ia toe silasila toto’a iai, ina ia mautinoa o loo sa’o atoatoa.

O le fale na agai iai le sailiga a leoleo ma maua ai lea taulealea e lē o o se maota o le Fofoga Fetalai.

Ua faailoa foi e le susuga Papalii Li’o Oloipola Ta’eu Masipa’u, o le tofiga Fofoga Fetalai e lē mo se vaega faaupufai ae o se tofiga mo le atunuu atoa.