Ua faamānavaina e le Matai Sili galuega i le ola nei a se tasi o tamālii o le atunuu sa lauiloa ai le igoa o Samoa i le lalolagi i le taaloga pii faapolofesa i totonu o Amerika i tausaga ua mavae, le susuga Papaliitele Max Amata Taogaga sa lauiloa i le suafa o Siva Afi.
O se alo o Samoa na amata ona ofi atu i lea taaloga a o faamautū ai i Niu Sila i le vaitau o le tausaga e 1974.
Sa siitia lona tulaga i le pii faapolofesa ina ua māfuta ma se tasi o tamalii sa lauiloa foi i lea taaloga i Amerika o Fanene Pita Maivia e pei ona faailoa i tala faamaumau o le soifua o Siva Afi i le taaloga pii faapolofesa.
E lē galo lea tamalii i le to’atele sa maimoaina lea taaloga i faletelevise i le tele o tausaga ua tuana’i, auā o po lava o le Aso Sa e maimoaina ai piiga a le WWF poo le World Wrestling Federation.
O lona tomai i le taaloga e pei ona faailoa i faamaumauga o le tala’aga o lona auai i piiga faapolofesa sa ia faato’ilalo ai nisi o alii pii malolosi e pei o Del Adams ma John Da Silva i Niu Sila, ae sa vaavaalua foi ma se isi o alii pii lauiloa o Jimmy Snuka ina ua ofi i le taaloga i totonu o Amerika.
O le tausaga e 1986 i le 1988 sa tausiniō ai i piiga faapolofesa a le WWF.
E tuumalo Papalii Max Amata Taogaga poo Siva Afi i lona aiga i Samoa i le Aso Tofi ua mavae, ua 77 tausaga o lona soifua.
