Ua faamautū nei le masina o Fepuari o le tausaga fou 2027 e valaau ai molimau e 20 o le matāupu tau faamasinoga o loo molia ai le afioga i le Palemia susuga Laaulialemalietoa Leuatea Polataivao Fosi i moliaga o le faia o tala taufaasesē ma le faasoesa e faaaogā ai auala o fesoota’iga faatekonolosi.
O moliaga e māfua mai i le tagi ua faaulu e ni alii leoleo se to’alua ma se isi tagata e faamautū i Ausetalia.
Sa faasee atu i le Faamasinoga Maualuga le su’esu’eina o moliaga ona o le mau e leai se Faamasino o le Faamasinoga Faaitumalo e mafai ona ia tauaveina ona o aafiaga i le matāupu poo le conflict of interest.
Peita’i e le’i faamalieina le Faamasinoga Maualuga i lea mau ma toe faia ai le faatonuga e ave moliaga e su’esu’e e le Faamasinoga Faaitumalo ona e talafeagai malosi’aga faaletulafono o lea faamasinoga ma le su’esu’eina o moliaga ua tuua’ia ai le ta’ita’i o le malo.
