O le lu’i faaletulafono a alii ma faipule o Leauvaa ua fesiligia ai faai’uga a le Faamasinoga o Fanua ma Suafa e faasino i se vaega o fanua o le nuu o alii ma faipule o Afega o loo nofoia e nisi o aiga o Leauvaa, e to’atolu faamasino o loo seei i le iloiloina o finauga ma mau o lea mataupu tau faamasinoga.
O le afioga i le Faamasino Sili, le afioga Satiu Simativa Perese, o le afioga i le tamaitai faamasino o le Faamasinoga Maualuga, afioga Niava Mata Tuatagaloa, ma se alii faamasino mai Niu Sila o loo tauaveina lea mataupu.
O le lu’i a Leauvaa o loo tula’i ai se alii loia mai fafo ma se loia i Samoa, ae o ni alii loia mai fafo ma loia e to’atolu i Samoa o loo finauina le tetee a le nuu o Afega.
E to’alua loia mai le ofisa o le Loia Sili a le Malo o loo auai foi i ia su’esu’ega ma taualumaga a le Faamasinoga Maualuga.
Mo le silafia e le atunuu o le finauga ua i luma nei o le Faamasinoga Sili ua sua ai le aulapa uta ma le aulapa tai i le finauga a le itu tagi e solifaavae le faai’uga a le Faamasinoga o Fanua ma Suafa.
O se mataupu foi lenei ua asiasi ai loia ma latou folasaga i le mau e faapea ua lē toe aiāina e le Faamasinoga Sili, faai’uga a le Faamasinoga o Fanua ma Suafa, ona ua taoto teuteuga o le tulafono faavae ua pasia e le Palemene, faapea le pasia o le tulafono fou o Faamasinoga o Fanua ma Suafa o le tausaga e 2020.
O le Aso Tofi o le vaiaso nei na amata ai finauga ma folasaga a loia lea na tatala i folasaga a loia mo le itu talosaga o le afioaga lea o Leauvaa.
E lua aso o loo faatulaga e tagofia ai lenei mataupu.
I se isi o galuega a le faamasinoga o loo taoto nei faasino lava i eleele o loo finau ai ia afioaga e lua, o le talosaga apili a alii ma faipule o Afega o loo lu’i ai le faai’uga a le Faamasinoga Maualuga i le faia o le poloa’iga e taofia lē tumau ai le galuega o tuaoi o eleele o le nuu, ua taatia e valaau i le vaiaso fou e toe faatulaga ai se aso e su’esu’e ai.
Sa faatulaga e tagofia le talosaga toe iloilo poo le apili i le Aso Lulu o le vaiaso nei, peitai ona o nisi o fetuuna’iga o galuega a le faamasinoga ua mafua ai ona toe tolopo.
