O le a muamua ona faapoi laau tumanu auā le paia o Samoa potopoto. Ae ā le paia o le Talalelei o loo talafaauto ma faapunapa’ulia i Aotearoa. Malu foi malu o le Tapuitea auā Tama a le Malo o Samoa i Niu Sila nei.
E sausaugatā launiu o le fua pe a pale ma malaga le mafua’alii. E fiu foi e taugafagafa le tuāvao lavelave. A lea ua fāō lapa manu o le tuasivi, ma ua taofiofi gatā le popoatu’i ua to manū mo Samoa i la tatou sa’iliga mālō sa fai nei. E valaau atu ai ma le faaaloalo i le pa’ia lasilasi o Samoa se’i o tatou fusifusi laau o le taua ae momoli lapalapa o mālō i Fogaa.
Ua atofa nei le afiafi o le Aso Faraile, 29 Novema 2024 mo le Lotu Faafetai mo le Sitiseni Niu Sila. O le nofoaga e faia ai o le falesa SISDAC, 17 Cape Road, Mangere i Aukuilani (6pm – 8pm). O le a auai le faipule ia Teanau Tuiono, o sui o le Malo o Niu Sila ma le Malo o Samoa, faapea le tinā ia Falema’i Lesā.
O lenei faamoemoe o loo feagai ma le Mafutaga Soofaatasi a Faifeau Samoa, Fono Faufautua a Samoa, ma le Pacific Leadership Forum i le itupa Samoa, le Taeao o Faiva. Momoli atu lo outou soifua tatou feiloa’i ai i le a’e manuia o la tatou sa’iliga mālō.
