Ua taualuga le fonotaga a le Ofisa o polokalame faalesiosiomaga a le Pasefika poo le S.P.R.E.P. i le feiloaiga a Minisita o le Siosiomaga mai le Pasefika se’i talatalanoa ma faasoa i nisi o mataupu o loo laualuga le tulaga aafia o le soifua o tagata o le Pasefika i suiga o le tau.
I se saunoaga a le Minisita o le Siosiomaga, Afioga Toeolesulusulu Cedric Schuster e talosagaina ai le mamalu o le auusufono ina ia mafai ona aogā lenei avanoa e talanoa ai ma iai se oso auā le fesoasoani i nai atunuu o loo tapuai mai.
“I aso faapenei, tatou fesili lava tatou ia tatou, aisea ua o tatou fesilafai ai faapea, e iai nisi o tatou o loo omai e faalogologo, o nisi e fia maua sina malamalamaga mai nei feiloaiga, o nisi ua maua le avanoa e faasoa ai lagona ma manatu ae o lea lava le uiga ua o tatou feiloai ai i lenei aso ia o tatou manatua se ‘ai o la tatou talanoaga mo nai o tatou tagata.
“O le tāua foi i Minisita o loo aofia mai i lenei talanoaga i Samoa ia faaauupegaina ai tatou ina ia mafai ona tatou fai atu i le lalolagi atoa o ā popolega o ā faamoemoega a tatou i le Pasefika ia faatumauina pea iinei i ona eleele.
“O tatou o leoleo o le ogasami tele ae o tatou foi o loo pito sili ona tulaga pagatia lo tatou siosiomaga ae o le ala lena o lea tatou te potopoto ai ma aoaoina tatou i manatu faasoa ma metotia mai isi.
“Ia o tatou fausia lo tatou sā ina ia mautinoa o loo tatou tausisia laasaga e ao ina usitaia ma taitaiina ai tatou i se lumanai mo tupulaga fai mai.”
Na faamalosiau ai Toeolesulusulu i le aofia ina ia malosi le unaia o le leo o le Pasefika i tulaga maualuluga i le lalolagi ina ia tetee atu i faafitauli faalesiosiomaga o loo aafia ai le Pasefika.
“E ao ina tatou tulei malosi atunuu tetele o le lalolagi ina ia tuuina le 100 piliona o loo moomia e faatino ai le Maliega i Pale poo le Paris Agreement.
“Ae o le mea tāua ia mafai e le Pasefika ona maua fesoasoani tau seleni ma ia tatou faaaogā ma le tatau i vaega o manaomia mo fuafuaga.”
Ua mae’a fonotaga sa feagai ma nisi o sui i le amataga o le vaiaso seia oo mai i le aso ananafi ma talanoaina ai le lasi o mataupu, o faiga faavae ma fuafuaga alualu mamao mo le mautinoa lea o le saogalemu o le Pasefika ma lona siosiomaga a o iai i suiga o le tau.
