Ua maua se faamatalaga mai le faauluuluga o le ofisa o Malo Aufaatasi mo tagata sulufa’i i Palesitina e faapea, o loo faaauau pea ona faasā e Isaraelu galuega fesoasoani mai le oo atu i le itu i Matu o Gaza.

Ua faasā ai sapalai o mea ua matua’i mana’omia aemaise taumafa ma vailaau.

Ua lipotia le aafia tele ai o falema’i ma ua leai foi se eletise i le tele o nofoaga o loo iai tagata manunu’a.

O fale foi o loo totoe ua tumutumu ai tagata ua oo lava i falelēta’ua se’i tulou ua nonofo ai nisi.

O le mau a Isaraelu o le autau a le Hamas lea ua toe faatulaga ane mai le itu lea i Matu o Gaza.

E lē faatagaina e Isaraelu le BBC ma isi ofisa faasalalau i totonu o Gaza ma ua faigata ai ona faamaonia nisi o faamatalaga feavea’i.

Fai mai le militeli a Isaraelu o loo latou siaki nisi o lipoti pe faamaonia ae o loo faaauau pea vesiga i lea faaitu a o talitali ai Malo Aufaatasi mo se isi lipoti e uiga i le auaunaga fesoasoani lea e lē o oo i nofoaga e pei ona ta’ua i Gaza, ae 30 aso na tuu e Amerika ia Isaraelu e tatau ona fai ai se faatatau mo se fesoasoni i tagata i Gaza aemaise le aufaigaluega a Malo Aufaatasi ua aafia ai soifua.

E silia ma le 42 afe tagata ua maliliu i Gaza talu mai le amataga o le taua e fua i faamaumauga a le matagaluega o le soifua mālōlōina o loo faafoe e le Hamas.

O se tasi lipoti aupito lata mai ua faailoa ai e Isaraelu, o a latou osofa’iga i Syria ua fasiotia ai le faauluuluga o le vaega o auaunaga tau tupe a le Hezbollah.

Puna o Faamatalaga: https://www.bbc.com/news/articles/cvglg9293ddo