O le ulufale ai i le atunuu i le masina fou o usugafono mai atunuu, Asia, Aferika, Kerepeane, Europa, ma le Pasefika o se galuega tele lea mo le matagaluega o le soifua mālōlōina o le a galulue i le leoina o o tatou tuaoi, i le ono sao mai o ni faama’i i Samoa.

Ua faailoa e le Faatonu Sili o le soifua mālōlōina i feiloa’iga a sui o soākomiti ma le autusitala, o se galuega ua tapena iai ina ia maua i nofoaga uma o le a faia ai le fonotaga, amata mai i le malaevaalele, faapea le uafu tele i Apia o le a taula ai le meli tele o le a nonofo ai nisi o usugafono ma tagata mai atunuu i fafo o le a malaga mai i le atunuu ona o le Fono a Malo o le Taupulega.

E tolu faama’i ua faailoa e le Faatonu Sili le susuga Aiono Dr Alec Ekeroma o le a mata’itū, o le misela, tale vivini ma le mpox poo le monkey pox lea ua iai tagata i atunuu tu lata mai i Samoa ua maua ai, e pei o Niu Sila ma Ausetalia.

O le ma’i misela o loo lipotia le pesi i nisi o atunuu o le Pasefika, ae o loo mata’itū nei e le soifua mālōlōina le tatau ona toe faamalosia le faia o tuipuipui e lē gata i lea faama’i ae faapena i le tale vivini.

O loo galulue faatasi le matagaluega ma le faalapotopotoga o le soifua mālōlōina o le lalolagi i le mata’itūina o ia faama’i ma ni aafiaga o le tatou atunuu.