I le fā o aso talu ona taofia i le maota gasegase i Motootua se alii o se tagata faigaluega a le faalapotopotoga o le malosi tau eletise le EPC, ona o se aafiaga mai le eletise a o faatino se galuega i ni laina eletise i Motootua i le Aso Lua ua mavae, ua lipotia le maliu o lea tagata ona o ia aafiaga e pei ona masalomia na mafua i uaea eletise.
O le toatele o tagata na faaalia o latou lagona alofa ina ua salalau ata o lea faalavelave i luga o le api o foliga, na aumai ai e le faalapotopotoga o le malosi tau eletise se pepa o faamatalaga faalauaitele na faailoa ai, le auina atu i le falema’i o lea tagata faigaluega.
E aumai lea faamatalaga mo le atunuu ae o loo taofia lē ua maliu i le potu mo gasegase tigaina i le maota gasegase o Tupua Tamasese Meaole i Motootua.
O le Aso Toonai na te’a nei na maliu ai lea tagata faigaluega, ma ua faaalia e se molimau o loo faagasolo se suesuega faalotoifale a lea auaunaga tuma’oti a le Malo i le mafuaaga o le tulai mai o le faalavelave na aafia ai lē ua maliu e pei ona masalomia na sipaka a o faatinoina galuega i laina eletise.
