O loo iai le fuafuaga a le taitai o le National Christopher Luxon e faapuupuu le piliota e tapunia ai le Palemene i le vaitau mafanafana.
Na ia faamatala i le Morning Report afai ae faatuina le faigamalo fou o le a umi atu ona faagasolo le Palemene a o lei oo mai le Kerisimasi ma e manatu e tatau foi ona vave amata i le amataga o le tausaga fou.
Fai mai Luxon e iai galuega o loo fia faia ma sa palota tagata Niu Sila mo se suiga ma e ao ona vave amata loa.
Ua faailoa tulaga lelei i talanoaga ma isi vaega faaupufai pei o le ACT ma le NZ First.
O loo faatali se faaiuga mautu seia mae’a ona faitauina le tusa ma le 570 afe o palota faapitoa lea e tatau ona faamae’a i le aso 3 o Novema.
Lipotia o le a lē malaga Luxon i le sailiga siamupini o le lakapi i le Ipu o le Lalolagi ona o loo taulai le silasila i le faamautuina o le faigamalo fou a le atunuu.
Fai mai a ia e matuai mitamita i le All Blacks ma e malosi foi lona manatu o le a manumalo.
