E eseese galuega ma auaunaga sa tilotilo iai le kamupani a le Trevelyan’s Pack and Cool Ltd i ta’ita’i o teams taitasi a le tatou atunuu ia i latou o loo agai mai i galuega faavaitaimi.
O le tautua faamaoni o ta’ita’i i le vaaiga o latou teams ma lipoti i le ofisa o le kamupani a le Trevelyan`s Pack le tele o mea lelei o loo mafai ona latou faatinoina i totonu o galuega ma nofoaga o loo nonofo ai, ua mafua ai ona tilotilo lea kamupani ma latou saunia loa ni tusipasi e tuuina atu i ta’ita’i o nei veaga e faailoa ai lo latou loto fiafia ma le agaga faafetai i galuega lelei a ta’ita’i o loo faia ia latou vaega i aso uma.
Ua maua e le Trevelyan’s Pack and Cool Ltd le mamā ma le matagofie o nofoaga o loo nonofo ma faamautu ia i latou i aso uma, faamaoni i taimi e usu ai ma taimi mālōlō faapea ma taimi mānava a o iai i le faatinoina o galuega.
E lelei le faatinoina o galuega e ala i le tauina o le apu, kiwi ma isi lava fualaau taumafa mata, fesootai i le kamupani ma faailoa iai vaega o le nofoaga ua faasolo iai le galuega.
O nei lipoti uma ua faamaumauina ai ni maka lelei o nei tamalii o loo ta’ita’ia mai galuega faatasi ai ma i latou uma o loo auai i vaega taitasi.
O le susuga ia Piva Filemoni, Esikia, Tovia Tuputala ma Molimau Vaoiva faapea ma isi tamalii ua lē o māua o latou suafa sa maua o latou tusipasi e aloaia ai a latou tautua faamaoni i galuega o loo galulue ai.
O nisi o nei ta’ita’i lelei e lē i lalo ifo o le 2 tausaga talu ona agai mai i nei avanoa o galuega faavaitaimi, o isi ua ova ma le 3 tausaga a o isi ua silia ma le 10 tausaga ma ua telē le sao lelei o nei polokalame i o latou aiga i Samoa.
