E iai le app mai Saina lea ua lipotia i le aso ananafi i le Channel 9 o loo faaaoga mo faatauga ae mafai ona faaaoga e sipai mai ai i tagata faatau.
Fai mai le lipoti o lea app e faaigoaina o le Pinduoduo e faaaoga mo le faatauina o lavalava, oloa ma soo se aitema lava ma e silia ma le 750 miliona tagata e faaaogaina i le masina.
Peitai fai mai le ausuesue i le faaaogaina o tulaga faapea e mafai foi e le app lea ona iloa mai nisi o apps i luga o lau telefoni, siaki faaaliga poo notifications ma faitau nisi o meli patino i le tagata e ana le telefoni ma ua faailoa foi o le taimi e download ai o le faigata ia ona toe aveese.
Ua lipotia o se suesuega na faia a le CNN i Amerika na faatalanoa ai nisi o tagata suesue i mataupu faapea mai Asia, Europa ma Amerika foi e faatatau i se ituaiga polokalame, software o loo aofia i le app lea e popole ai tagata i le liki atu o a latou faamaumauga.
