O le tausaga e 2015 na amata tapena ai e le Malo le faatuina o se matagaluega e tapuvae tasi uma iai mataupu tau eleele o le Malo ma o le tausaga lenei e 2024 ua iva iai tausaga o ia tapenaga, ma ua amata ai ma lea matagaluega fou a le Malo.
O le Aso Faraile na te’a nei na tatala aloa’ia ai le matagaluega o eleele ma fuagāfanua ua i le vaaiga a le Minisita o le matagaluega o puna’oa faalenatura ma siosiomaga, le afioga Toeolesulusulu Cedric Schuster.
O lea foi ua filifilia e le Kapeneta sona faauluuluga poo se Ofisa Sili e pei ona tauave e le tofa Ulugia Petelo Kavesi, ua valu tausaga o avea ma Pule o le Faalapotopotoga o Eleele a le Malo, o se faalapotopotoga ua aveesea nei ina ua faatuina lea matagaluega a le malo, ua tagofia uma ai mataupu tau fuafanua ma eleele o le malo e aofia ai fanua o le faalapotopotoga o le Esetete Tausi.
Faaalia e le tamaitai Palemia i le tatalaina o lea matagaluega fou, e 8 tesimale 5 miliona le vaegatupe na pasia i le tala autū o le tupe o loo faagasolo, e amata ai le tautua a lea matagaluega.
Peitai na ia faaalia e toe mana’omia nisi vaegatupe e pei ona fuafua e tuuina atu i le tala faaopoopo o le tupe o le a folasia i le Palemene i le masina o Tesema o le tausaga nei.
O se vaega o le saunoaga autū mai le ta’ita’i o le Malo le afioga i le Palemia, Fiame Dr Naomi Mataafa, i le sauniga na aloa’ia ai le tatalaina o le matagaluega fou o eleele ma fuagāfanua.
O le maota sa iai le faalapotopotoga o eleele le Samoa Land Corporation i Tuanaimato, ua avea ma nofoaga autū o lea matagaluega a le malo.
