Ua mae’a nei ona tuuina atu folasaga a le tamaitai loia le afioga Sala Josephine Stowers o loo tulai mo le nuu o Leauvaa ua folasia ai mau e lagolago ai le latou tagi ua soli e alii ma faipule o Afega le poloaiga a le Faamasinoga Maualuga, i le faaauau pea ona faia galuega i eleele o loo tulai mai ai feteenaiga i le va o ia afioaga e lua.

Na faaalia e le loia a le itu tagi, o le tuanai o aso e lua talu ona mae’a faia le poloaiga e taofia ai ona toe faia se galuega i fanua o loo aafia i le finauga faaletulafono na agai atu ai nisi o le aumaga a le nuu o Afega ma tala i lalo se tunoa o se tasi o aiga o Leauvaa ma faalalo nisi o laau totō.

O loo tuua’ia ai i lea gaioiga nisi o matai o lea afioaga i lo latou faia o se faatonuga e faatino lea gaioiga.

O matai ia e aofia ai Maulolo Tavita, o Ututaaloga Charlie Ulia ma se atalii o Ututaaloga.

Na tuuina atu e le tamaitai loia mau tusitusia mai nisi o Leauvaa e faamaonia ai lea tuua’iga.

E faapena foi ni mau e faamaonia ai le tasi o tuua’iga a Leauvaa faasaga ia Maulolo Tavita o lona tuu maualaloina o le faamasinoga ma le Faamasino Sili i ni ana saunoaga ma lafoga i nisi o auala o faasalalauga.

O lea moliaga e ta’ua o le scandalizing the court ma sa faaaogā ai e le loia a le itu tagi ni mau mai le faamasinoga a le vaega faaupufai o le Faatuatua i le Atua Samoa ua Tasi na molia ai i le lē usitai i le Faamasinoga ma le Palemene le ta’ita’i o le vaega faaupufai e puipuia aiātatau a tagata ma nisi o faipule ma sui lagolago o lea pati faaupufai.

I le folasaga a le tamaitai loia mo alii ma faipule o Afega le afioga Mauga Precious Chang, na ia finauia ai e tatau ona faalēaogā moliaga ua faia e le itu tagi.

O le mau a le itu tetee e leai se vaega o le poloaiga a le Faamasinoga o Fanua ma Suafa na faatulai ese ai aiga e 18 ma aiga e 101 o Leauvaa o solia e Afega.

O ia poloaiga e lua o loo mafua ai ona faatino e Afega galuega i o latou eleele.

O le poloaiga foi a le Faamasinoga Maualuga na faia i le aso 9 o Aperila e taofi le toe faia o ni galuega i le fuaina o tuaoi o ia eleele, e leai se vaega o solia, auā o loo manino o lea poloaiga e faasino i alii ma faipule o Afega ae leai ni suafa o ni tagata taitoatasi o ta’ua ai.

O le moliaga foi faasaga ia Maulolo Tavita i ni ana saunoaga e faapea ua ta’ufaatauvaa ma faamaasiasi ai le faamasinoga, na faailoa e le loia a Afega i lana folasaga, e ao i le itu tagi ona tuuina atu ni mau ‘anoa e faamaonia ai e aunoa ma ni masalosaloga tatau.

O mau ua tuuina atu e lagolago ai lea tuua’iga a le itu tagi, e pei ona sii mai i le faamasinoga i le va o le Faatuatua i le Atua Samoa ua Tasi ma Tuilaepa Sailele Malielegaoi, e matuā eseese mamao ma mau o tuua’iga ua faia e le itu tagi.

Ua tolopo nei se faaiuga a le afioga i le Faamasino Sili, e lē o iloa se aso e fofogaina ai.