Ua valaau nei le Pulenuu o Aukilani, Wayne Brown i le malo ina ia totogi ane rates i o latou fale o loo i le city poo le aai, ma le faamatalaga e faapea afai ae faia lea tulaga o le a maua ai le $36 miliona i le tausaga mo le aai aupito telē o Niu Sila.
O loo ta’ua i le lipoti a le One News e iai fale o le malo i Tamaki Makaurau e aofia ai ma aoga ma falemai.
Mo le taimi nei e lē o totogia ni a latou rates ae afai e totogi fai mai le Council e silia ma le 36 miliona i le tausaga e fua i le value poo le tau o loo iai i le tausaga faaletupe 2023/2024.
Ta’ua e le alii Pulenuu e tatau foi ona totogi ane e le malo le faaaogāina o le infrastructure.
O isi meatotino a le malo e aofia ai le malaevaalele, lotu ma fanua o loo iai uafu ma e lē o totogia ni rates i mea uma ia ma fai mai Brown ua tatau ona iai se toe faatulagana o le tulafono i mea ia aemaise o loo matuai faigata mo tagata Aukilani lenei taimi o le soifuaga.
Ua manao foi le Pulenuu ia toe faafoi ane se vaega a le Council mai lafoga faaopoopo poo le GST o loo totogi mo fale fou e fausia i le aai.
O loo ta’ua i le lipoti se saunoaga mai le Minisita o Tupe, Nicola Willis i le mataupu lea e faapea o loo faagaioi nisi o faiga faavae mo le mataupu lea ma o loo telē le avanoa mo ni faatalanoaga ma le Pulenuu mo mea e aogā i le pulega.
