O lea ua to’ai taunuu le faamoemoe sa fuafuaina e nisi o alo o le atunuu o loo aumau i Amerika o le faaaliga o teuga o ofu poo se fashion show e faalauiloa ai taleni a tagata Pasefika lea e aofia ai ma nisi mai Samoa nei.

O lenei faaaliga o se faamoemoe na fuafua mai i le masina o Setema i le tausaga ua mavae e Afa Ah Loo o se alo iloga o Samoa i le taleni o le su’isu’i, Benjamin Powell i le tomai o le teu ulu ma makeup ma Kalolaine Pahulu Rapp o se fai pisinisi jewelleries.

I se faatalanoaga ma le ABC4 na ia ta’ua ai o se amataga tele lea mo lenei faamoemoe.

“O le taimi muamua lea o lenei faaaliga ma e tele nisi fuafuaga o loo fuafua e maua ai ni resources a o ni aoaoga foi e atina’e ai lea ituaiga taleni e tagata Pasefika ma le vaega o pisinisi faapenei i Amerika.”

E 14 pisinisi o loo auai ai i lenei faamoemoe.

O se avanoa foi lea e faalauiloa faatasi ai nei taleni ma aganuu a le Pasefika.

O le aso 29 o le masina ua atofa ai lenei faamoemoe tele i Utah.