Ua savalia nei le fa tausaga talu ona faamalosia se teuteuga o tulafono faatonutonu a le Matagaluega o leoleo, falepuipui ma le ola toe fuataina, na tapu pe faasā ai ona toe faigaluega faatasi ni ulugalii faaipoipo o ni leoleo uma i totonu o le matagaluega.
E toa 23 Malu o le Malo na motusia ai a latou auaunaga ina ua faamamalu lea tulafono faatonutonu, peitai ua faailoa e le sui Komesina o le Matagaluega susuga Papalii Monalisa Tia’i Keti, ua iai se finagalo o le Minisita o leoleo e toe teuteu lea tulafono faatonutonu poo se regulation, ina ia mafai ona toe galulue ni ulugalii o loo avea ma ni Malu o le Malo.
Ua faailoa e le sui komesina o se teuteuga o le a toe mafai ai lea tulaga, ae o le a le toe galulue faatasi se ulugalii leoleo i se vaega e tasi, ae o le a eseese vaega o le auaunaga a le matagaluega e galulue ai.
O le tausaga e 2018 i le faigamalo sa iai, na faatino ai lea tulafono faatonutonu ona o nisi o vala ma to’a sa aafia ai le faatinoga o galuega faalotoifale a le matagaluega, ma na masua mai ai i fafo ni lagona faaseā o nisi o leoleo ma latou tuuaia le faigamalo i lea taimi i le faailoga tagata o lea tulafono faatonutonu.
Na faaleo foi i le Palemene i le tausaga lava lea ni finagalo lē fiafia o nisi sui usufono i le faatulai mai o lea tulafono ma faamalolo ai nisi o leoleo e aunoa ma ni faamanuiaga tau tupe, poo le sailia foi o nisi matagaluega a le Malo e faaauau ai le latou tautua.
E lei faailoaina e le sui komesina poo afea e faatino ai le teuteuga o le a toe mafai ai ona galulue ulugalii o ni leoleo uma i totonu o le matagaluega.
