O le mae’a ai i le Aso Faraile ua mavae o le faauluina o suafa o sui faatutū mo le palota laitiiti a le itumalo palota o Safata 2, ua faailoa ai e le Komesina o faigāpalota e to’atolu sui ua lesitala mo le faigā filifiliga o le a toe sa’ili ai se sui usufono i le Palemene o lea itumalo palota.
O sui faatutū ua faailoa ata ma suafa i faasalalauga faalaua’itele a le ofisa o le komisi o faigāpalota ua aofia ai tamalii e to’alua ma le sui tauva tama’ita’i.
O i latou ia e aofia ai lē sa seei i le nofoa o Safata 2 le afioga Tuiā Pu’a Fuatogi Letoa, o le a tauva mo le vaega faaupufai o le Faatuatua i le Atua Samoa ua Tasi, o le susuga Leleua Suataga Aso ma le sui tauva tama’ita’i le afioga Toleafoa Losalia Sagalala Niumata, o le a tauva o ni sui tuto’atasi.
Ua faailoa e le ta’ita’i o le vaega e puipuia aia tatau a tagata i tusitala, ua faia le faai’uga a lana patī faaupufai e leai so latou sui faatū mo le palota laitiiti a Safata 2 ae o le a tapena mo se isi p4grtrlota i le lumana’i.
O le Aso Toona’i na te’a nei na amata ona faatino ai e le ofisa o le komisi o faigāpalota le lesitala mo tagata palota o lea itumalo e fia maua le avanoa i le palota muamua.
O le Aso Lulu o le vaiaso nei e oo atu ai sui o le ofisa o faigāpalota i nuu ma afio’aga o Safata 2 e faatino ai lea lesitala ma o se galuega e mae’a i le Aso Faraile o le vaiaso nei lava lea e tapunia ai le lesitala mo le palota muamua.
O le Aso Lulu le aso 8 o Iulai ua atofaina e faia ai le palota muamua ae Aso Faraile 10 o Iulai o le palota laitiiti a Safata 2.
