Na maitauina le faatumulia o le Fale o Samoa i Magele i le Aso Toona’i na mavae atu nei, ina ua lolofi atu le mamalu o Samoa i Aukilani e fia feiloa’i i le afioga Vaovasamanaia Winston Peters ma nisi o sui o lana vaega faaupufai le NZ First, a o fofola mai nisi o latou anavatau o le a fuafua e fia faataunuu mo se manuia o le atunuu pe afai ae tula’i mai i le pulega o le malo i le faigāpalota tele o loo loma nei i le masina o Novema o le tausaga nei.
O le Fono Faufautua a Samoa i Aukilani sa galulue i le faamaopoopoina o lenei faamoemoe ma sa vaaia le malosi o le lagolago a le atunuu aemaise foi na fai ma tovā lauga i faafiafiaga na saunia e le ausiva a nisi o alo tama’ita’i o Samoa o loo faafoeina e le afioga Tevaga Esther Tevaga.
O le faatasiga foi lea na faalauiloa aloa’ia ai ma le faamoemoe o le afioga Tevaga Esther Tevaga, o le a tauvā mo le nofoa o le itumalo faapalota o Manurewa i le faigāpalota tele o loma nei, i lalo o le fu’a a le vaega faaupufai a le NZ First.
I le itulau a Tevaga i le fb, o loo faailoa ai lona agaga faagaeetia i le lagolago a Samoa sa faailoa i lea aso e lē gata mo le vaega faaupufai a le NZ First, aemaise foi mo lona faamoemoe ua tapena atu iai.
Ma ua faailoa foi e le afioga Tevaga o lea o le a amata aloaia ana faalauiloa i masina o lumana’i nei, ma o lana itulau i le fb o le a amata ai ona faasolosolo mai ona faasoa lana faatofāla’iga i mea ua ia manatu o le a galue ai mo se lelei o lona itumalo faapalota o Manurewa, pe afai ae tuu atu le latou faatuatuaga na te momolia o latou finagalo i totonu o le Palemene.
