O solitulafono sa tula’i mai i le vaiaso ua mavae ma faaaogā ai ni laaumalosi poo fana, ua silasila ai le Matāgaluega o Leoleo, Falepuipui ma le Toe Fuata’ina e faia ni suiga i le laiseneina o ia ‘au’upega ina ia mafai ona faatonutonu ai le faaaogāina tatau e tusa o le māfua’aga na talosaga ai se tagata na te fia umia se laaumalosi.
E pei ona silafia o le tele lava o talosaga mo le fia maua o se pemita e faatau ai se laaumalosi mulimuli ane laisene faaletulafono pe a talia se talosaga, o le fia leoleoina o se faato’aga mai meaituāolō taaloa, poo le faaaogā i se atina’e manu papalagi poo povi.
Peita’i ua molimauina e le matāgaluega ua faaaogā sesē laaumalosi ma ua aafia ai ma le soifua saogalemū o tagata.
Susuga Leiataua Samuelu Afamasaga o le Sui Komesina o le Matāgaluega o Leoleo, Falepuipui ma le Toe Fuata’ina.
O loo silasila le matāgaluega e toe faatino se isi polokalame o le tuuina atu o laaumalosi e lē faatagaina ona umia e se tagata ma laaumalosi e le’i lesitalaina ae o loo faataga ona umia ma faaaogā i Samoa.
