O loo iai le fuafuaga e faimalaga le alii Palemia o Christopher Luxon i se fonotaga a le NATO e usuia i Amerika i le masina nei.
Na lipotia i le One News o Uosigitone e faataunuu ai lea fonotaga ma o le a malaga ai le Palemia i le aso 9 o le masina nei, o le a feiloai ai ma sui mai atunuu e 32 o le NATO ma ana paaga.
Na ia ta’ua i sana saunoaga o le tulaga manuia o le soifuaga e faalagolago tele i le puipuiga o se atunuu ma o se tasi lea o vaega o loo taulai iai lea faamoemoe.
Na faasoa mai le Palemia, o Amerika o le tamaoaiga aupito tele lea i le lalolagi ma o le paaga aupito tele lona lua lea a Niu Sila i fefaataua’iga ma e tāua tele le iai o sootaga lelei faapisinisi ma Amerika.
Na saunoa foi le Palemia ua una’i mo lea malaga ina ia fausia mafutaga ma sootaga lelei auā le agai i luma o pisinisi ma le toe faaleleia o le tamaoaiga o Niu Sila.
O le NATO o le North Atlantic Treaty Organisation e aofia ai atunuu e 32 mai Europa ma Amerika i Matu ma e tulai mo le puipuiga o tagata aemaise ona teritori.
Puna o Faamatalaga: https://www.newshub.co.nz/home/politics/2024/07/labour-s-chris-hipkins-on-labour-s-bid-to-win-back-auckland.html
