O le talosaga a le afioaga o Leauvaa e mo le faamasinoga maualuga ina ia tuu atu se poloaiga, e taofia ai le faatinoina o galuega a le afioaga o Afega ona ua ōia aiātatau a tagata o loo aafia i ia faiga.
E lē gata i lea ae ua talosaga foi e faanatinati ona iloilo o le talosaga, talu ai o lea ua aafia eleele ma maota a tagata o loo nonofo i Leauvaa.
Faailoa foi e le tamaitai loia o loo tulai mo Leauvaa o Salā Josephine Stowers le tatau ona taofia uma o faatinoga ona o loo taatia la latou talosaga apili i luga o le faamasinoga o talosaga ma iloiloga a le Faamasinoga o Fanua ma Suafa.
O lea faamasinoga e lē o mautu mai poo afea o le a amata aloaia ai, peitai na faailoa e Salā e lē tatau ona faia nisi gaioiga, seia vagana ua mae’a valaau i luga o le faamasinoga o talosaga toe iloilo.
O eleele o loo finauina pea ei tua o le 723 eka lea ua mae’a faia ai faaiuga e 9 a le Faamasinoga o Fanua ma Suafa, o fanua e pulea e Fata ma Maulolo ma Alii ma Faipule o Afega.
O le a toe valaau i le taeao nei lea mataupu e faamautu ai se aso e iloilo ai.
