Ua loa ona silafia e le toatele le tulaga ua iai Samoa ma ona faigaupufai ma e le gata ua talanoa ai le lalolagi ae o lea ua talosagaiga foi e le aufaigaluega paia a le Atua o loo galulue i le tau asuina o le ipu vai o le ola i totonu o le atunuu ina ia to’a filemu pea Samoa.
O le po anapo na tuu mai ai se faamatalaga a le Fono Aoao a Ekalesia i Samoa e tauala mai i le Taitaifono afioga ia Rev. Kasiano Leaupepe. O lana faamalosiau, na ia toe faamanatu ai i taitai o le malo le faavae a Samoa , o le Atua lea.
Taua e Kasiano “ ia alofagia pea e le Atua si o tatou atunuu , a fālō le maea i lenei viatau auā upufai a malo ia maua pea e Samoa e toafimalie , le ava faatupu ma le ava faatamalii ae o le va tootoo faa faleupolu o le faavae moni lena o le atunuu , lea ua faapulou le talalelei, faavae i le Atua Samoa”
Na talosagaina ai foi e le taitaifono faifeau uma o Samoa ina ia faauau tatalo mo Samoa a’o tulimata’i pea fuafuaga ma vaega faaupufai a le malo ma le atunuu aua le sailiga manuia o se faigamalo mo Samoa.
