Poo le ‘afa o mataupu na talanoaina i le feiloaiga a le Palemia o Niu Sila, Christopher Luxon ma le ta’ita’i o Saina, Premier Li Qiang, o itu e eseese ai finagalo o atunuu e lua.
O le aso ananafi lea na iai Li Qiang i Ueligitone, faamoemoe o le asō faasolo atu a taeao o le a iai i Aukilani mo nisi lava o feiloaiga tau i fefaataua’iga.
O le talanoaina o le maliega, Comprehensive Strategic Partnership lea ua faamanatu le 10 tausaga talu ona osia i le va o Niu Sila ma Saina o le faatumutumuga lea o le faimalaga mai o Li Qiang.
A o lei sau ai i tua tala o le feiloaiga a ta’ita’i o malo e lua ananafi, o lea lava na muai vavalo e Luxon o le a ia aumaia i luga mataupu nei e talanoa.
E lē tau fesiligia o le AUKUS lava le mataupu aupito i sili ona lē auai ai Saina ia Niu Sila, poo le maliega lea o loo vaavaai ai nei Niu Sila e faaipoipo atu faatasi ma Ausetalia, Amerika ma Peretania.
E ui e lē lagolagoina e Saina le auai o Niu Sila i le AUKUS, ae ioe ta’ita’i o malo e lua, o loo malamalama e lē o mataupu uma e tutusa ai a laua ioega.
Ae fai mai le Palemia o Niu Sila, e lei ‘alo lona aumaia i luga o vesiga i le South China Sea ma le Taiwan Strait.
E ese mai i itu nei, o le feiloaiga foi ananafi ua faailoa ai e Li Qiang ua sauni Saina e faalautele mai ia Niu Sila le faiga o loo agavaa ai atunuu Europa ma Meleisia lea e ulufale atu ai i Saina e aunoa ma le tau moomia o ni visa malaga.
Puna o Faamatalaga: PM meets Chinese premier: Visa-free access to China signalled (1news.co.nz)
