Ua molimoli faamaisega ma faamafanafanaga i le Aiga Tupu ma tagatanuu uma o le Malo o Peretania, mai le afioga i le Ao o le Malo o afioga Tuimalealiifano Vaaleto’a Sualauvi II, ma lana Masiofo, e avea ai ma sui o le Malo ma tagatanuu uma o Samoa, ona o le ufitia i le ao pogisa o le aiga tupu ma lea malo tele o le lalolagi i le valaau paia a le Atua i le Ao o lea Malo, o le faaao foi o Malo o le Taupulega o loo avea ai Samoa ma se tasi o sui o atunuu e 54 o loo i le lio o lea faalapotopotoga tele o Malo o le lalolagi.
I lana faamaisega tusitusia i le gagana Peretania, ua faailoa ai e le Ao o le Malo o lana Maiesetete Kuini Elisapeta II, o se taitai ua iloga lona sao a o avea ma Tupu o lona atunuu i le atiina ae ma le nonofo lelei o ona tagata.
O ia foi o se taitai i taimi o lana nofoaiga sa mauaa ma malosi, lana taitaiga mai tausaga na faatoa seei ai i le Nofoalii o le Tupu faasolo mai i taimi o suiga tetele o le lalolagi, aemaise o luitau sa feagai ma ia.
O lana tautua ua le gata ina sapi ai atunuu o le lalolagi i le faasoa atu iai o le tamaoaiga o Peretania tele i soo se atiina ae, ae ua faasoa mai foi ia Samoa ma isi atunuu o lenei faaitulagi o le Pasefika.
O le tausaga e 1977 i le masina o Fepuari na asiasi mai ai i Samoa le Tupu Tamaitai o Peretania ma lona Alii, o se vaega o lana malaga taamilo i atunuu o Malo o le Taupulega ina ua faailoga le Iupeli siliva poo le 25 tausaga talu ona avea ma Tupu o lona Malo.
O le Aso Tofi na tea nei na tuumalo ai Kuini Elisapeta II i le 96 tausaga o lona soifua, ma o ia le uluai Tupu o Peretania ua pito umi tausaga o lana nofoaiga e 70 ma sa faailogaina i Samoa e le ofisa o le Malo Peretania i lo tatou atunuu le atoa o ia tausaga o le nofoaiga a le Tupu Tamaitai.
