O se tama talavou lea ua molia ona o se faalavelave na lipotia mai i se  aoga i Melepone lea fai mai e toatasi o loo taofia ai i le falemai.

O le fesoasoani faavavave ua ta’ua na valaau ane i le faalavelave lea i Melton South poo le ta o le 3 i le aoauli o le Aso Lua na lipotia ai se talavou ua tui e se tasi se’i tulou.

Ua faailoa e le 9News e 16 tausaga o le tamaitiiti na aafa e lē tigaina tele ona manu’aga ma ave atu ai loa i le falemai.

O le isi foi la tama talavou e 17 tausaga e talitonuina na sola ese mai le vaega na tupu ai le faalavelave na toe agai ane i le ofisa o leoleo ma pueina ai loa ma molia.

E lē o ta’ua mai se aso e tulai ai i le faamasinoga ae o loo sue pea e leoleo le isi alii e toalua ai i laua o loo feta’ua’ina na aofia i lenei faalavelave.

E lē o faailoaina foi le mafuaaga o lea mataupu.